Пойыз жолаушылары вагон дәлізінде ұйықтаған

№41 Алматы–Атырау бағытында қатынайтын пойызда түсірілген адам шошырлық суретке «Жолаушылар тасымалы» пікір білдірді.
«Жолаушылар тасымалдайтын пойыздың әр вагонында «Жолаушылар тасымалы» АҚ-ның басшысының телефон нөмірі жазылған. Жолаушылар WhatsApp желісі арқылы аталмыш нөмірге арыз-шағымдарын жібере алады. Ақпарат келіп жеткен соң, «Жолаушылар тасымалы» АҚ президенті сурет авторымен бірден байланысты. Мәселенің жай-жапсарын анықтау үшін Атырау қаласына өндіріс бойынша вице-президент жөнелтілді. Қазіргі уақытта қызметтік тергеу жүріп жатыр. Егер де ақпарат расталса, кінәлілер қатаң жазаланады, жұмыстан қууға дейін барамыз. Жыл басынан бері тәртіп бұзған 124 қызметкермен еңбек шарты бұзылған болатын», – делінген компанияның мәлімдемесінде.

Жолаушы азамат пойызға жиі мінетінін және мұндай жағдайлардың жиі орын алатынын айтады.“Мен осы пойызға 4-5 жылдан бері айына бір рет мініп келемін. Террорлық қауіптілікке де, басқаға да қарамастан бұл жағдай қайталана береді. Билеті жоқтарды отырғызады, ол аздай ақша үшін кез келген қораптарды ала береді. ҚТЖ-ның «Жолаушылар тасымалы» АҚ президентімен тікелей байланысуға болатынын барша жұрт білсе деймін. Басшылыққа осындай азаматтардың келуімен бұл мәселе оңтайлы шешімін табады деп үміттенемін”, – деп ағынан жарылды пойыз жолаушысы Асқар Екшембеев.

stan.kz