Павлодарда трамвайға найзағай түсті

Бүгін Павлодарда түскі сағат үш шамасында күн күркіреп, найзағай ойнады. Найзағайдың бірі ішінде жолаушылар болған трамвайға түскен.

«Найзағай трамвайдың электр құрылғысына түсіп, от ұшқындады. Оқиға орнына өрт сөндірушілер келіп, тұтанған өртті дереу өшірді», — деді Павлодар қаласы трамвай басқармасының баспасөз қызметінен. Жолаушылардың ешқайсысы зардап шеккен жоқ.

Қаладағы найзағаймен бірге құйған нөсер жауын жолдар мен көшелерді суға толтырды.

«Біздің бригада қазіргі кезде су көп жиналған жерлерде жұмыс жасап жатыр», — деп хабарлады ТКШ бөлімінен. Қалада су сору жұмыстарына 7 көлік жұмылдырылды.

ҚазАқпарат