Павлодарда діни экстремизмді насихаттаушы ұсталды

Павлодарда облыстық ІІД арнайы жасақ бөлімшесінің қолдауымен ұйымдасқан қылмыспен күрес басқармасының қызметкерлері және ҰҚК департаменті теріс діни ағым жақтаушысын ұстады.

Күдікті 1996 жылы туған, ол ғаламторда әлеуметтік желілер мен бағдарламалар арқылы «терроризм мен діни экстремизм идеясын насихаттаған, сондай-ақ, аталған мазмұндағы материалдарды сақтаған және таратқан», — деп хабарлады Павлодар облысының ІІД-і. Полиция тергеушілері сотқа дейінгі тергеу жұмыстарын бастады. Сот шешімімен күдікті тұтқындалды. Өңірде бұған дейін де теріс діни ағым жақтаушылары ұсталған. 2016 жылдың аяғында Павлодар облыстық ІІД-нің ұйымдасқан қылмыспен күрес басқармасының қызметкерлері «Хизб-ут-Тахрир әл Ислами» діни-экстремистік партиясының құрылымдық ұйымы құрамында қылмыс жасаған Павлодар тұрғыны Р.Гинатуллинді ұстады, ол ұзақ мерзімге бас бостандығынан айырылды. ҚазАқпарат хабарлағандай, 2017 жылы «Хизб-ут-Тахрир әл Ислами» заңсыз әрекеттеріне қатысқан Екібастұз тұрғынына қатысты сотқа дейінгі тергеу жұмыстары басталды.