Пара алғыш полицейлер құрықталды

Ақтөбе облысында жүргізушілерден пара алып отырған қылмыстық топтың беті ашылды. Бұл туралы Ақтөбе облыстық  Жемқорлыққа қарсы күрес Ұлттық бюросының департаменті  хабарлады.

Ведомствоның мәліметінше, ұсталғандар облыстық ІІД ЖПҚ (жергілікті полиция қызметі) қызметкерлері болып шықты. «Старшина Бижанов, старшина Еркінов және сержант Шадыманов жүргізушілерді әкімшілік жазаға тартпас үшін жүйелі түрде пара алып отырған. Осылайша 80 мың теңге көлемінде кезекті рет пара алу кезінде полицейлер қолға түсті», — делінген хабарламада.

Ұлттық бюродан айтып өткендей, ұсталған полицейлер кінәсін толық мойындады. Қазіргі кезде қызметтік тұлғалар Ақтөбенің уақытша қамау абақтысына жабылды. Сот алды тергеу жұмыстары жүргізіліп жатыр.

Tengrinews.kz