Оқушыға 840 теңге, қаңғыбас итке одан бес есе көп ақша жұмсалады

Бүгін Мәжілістің Экология мәселелері және табиғат пайдалану комитеті «Жануарларға жауапкершілікпен қарау туралы» заңға өзгерістер мен толықтырулар енгізу мәселелеріне арналған дөңгелек үстел өткізді.

Мәжіліс депутаты Анас Баққожаев осы мәселеге қатысты пікір білдірді. «Мұндай жануарларды уақытша изоляторда ұстауға неліктен 60 күн ақша жұмсау керек? Бізде оқушыларымызға жеткілікті деңгейде ақша бөлініп жатыр ма? Жоқ. Егер қателеспесем, 840 теңгедей ғана. Ал иттерге кейде одан да көп жұмсаймыз.
Мен миллиондаған иттің өмірі бір адамның өміріне татымайды деп есептеймін. Қалай айтсаңыз да, татымайды. Немесе жануарларды қорғау ұйымдарының өкілдері, жұбатып көріңіздер. Шелекте, Шамалғанда қаңғыбас иттің дүкенге бара жатқан баланы тістеп тастаған оқиғасы болды. Барып, жұбатыңыздар немесе өтемақы төлеңіздер. Жануарларды қорғаушылардың ақшасы бар ғой, өтемақы төлеңіздер. Егер жануарларды көлік қағып кетсе, онда иесін жауапқа тартуға болады. Ал ит болса, онда жануарларды қорғау ұйымдар өтемақы төлесін», — деді ол.

JQ-Aqparat

Фото: atr.kz