«Нөлдік төзімділік: Түркістан полициясы құқық бұзушылықтың жолын кеседі

Елімізде қандай да бір құқық бұзушылықтарға төзбеу — қоғамдағы қауіпсіздікті қамтамасыз ету жолындағы маңызды қадам. «Нөлдік төзімділік» қағидаты әр азаматтың құқық бұзушылықтың кез келген түріне тойтарыс берумен қоса, өзінің де тәртіп бұзбауы дегенді білдіреді. Басқасын былай қойғанда, айналасына қоқыс тастамай, қоршаған ортаның тазалығын сақтау да маңызды. Түркістан өңірінің полициясы күнделікті жұмысында осындай тәртіпсіздіктердің де алдын алуға тырысады.
Мәселен, Сауран ауданында өткен «Тазалық» жедел-профилактикалық іс-шарасы аудан көлемінде тазалық пен қоғамдық тәртіпті қамтамасыз етуді көздейді. Аталмыш іс-шара барысында қоршаған ортаны ластаған құқық бұзушы тұлғаларға қатысты 87 әкімшілік құқық бұзушылық туралы хаттама түзілді.
Оның ішінде қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы нысандарын зақымдау, жасыл екпелерді жою және бүлдіру бойынша — 28, жолдар мен темiржол өтпелерiн және басқа жол құрылыстарын бүлдiруге қатысты 25 және көпшілік орындарды ластау бойынша 34 әкімшілік хаттама толтырылды.
Сондай-ақ көшелерді патрульдеу де өз жемісін беретіні сөзсіз. Бұл жол-көлік ережесін бұзудың алдын алуға қоса, кейде мойнында миллиондаған қарызы бар борышкерді құрықтауға мүмкіндік береді. Сондай бір оқиға Түркістан қаласында орын алды. Жедел басқару орталығынан патрульдік полицейлердің планшетіне трассадағы борышкердің көлігі бойынша сигнал түскен. Әлгі көлікті тоқтатып тексерген кезде полиция қызметкерлері Қызылорданың 46 жастағы тұрғыны сот орындаушының қаулысына сәйкес 90 миллион теңгеге жуық берешегі бар екенін анықтады.
Заң талабы бойынша, борышкердің көлігі айыппұл тұрағына қойылды. Полиция салынған айыппұлдар мен қарыздарды уақтылы төлеу қажеттілігі туралы жүргізушіне түсіндірді.

JQ-Aqparat