Несие қамытын сүйрегендердің тең жартысы – студенттер

Бұл туралы қаржы министрлігі мемлекеттік кірістер комитеті төрағасының орынбасары Қайрат Миятов мәлімдеді.

«Біз несие алатын азаматтардың неге көп екенін зерттегенде, олардың тең жартысы студенттер екені анықталды. Біріншіден, олар жауапкершілікті өзіне алып, ата-анасына ауыртпалық артқысы келмейді. Екіншіден, олар ойланбай сауда жасайды. Тұрақты табысы болмай, тек шәкіртақы алып отырса да, сәннен қалмай қымбат гаджеттер сатып алады. Соның нәтижесінде несие алған, бірақ өтеуге мүмкіндігі жоқ азаматтар көбейеді. Өзін банкрот деп танудың үлкен салдары бар болғандықтан, біз студенттерді негізсіз несие алудан сақтандыруымыз керек», – деді Қайрат Миятов.
Сондай-ақ ол жастар арасында ең бірінші кезекте ипотека алуға байланысты қиындықтар болатынын атап өтті.
«Шартты түрде қарастырсақ, ІІІ курста оқып жүрген студент бір жылдан кейін оқу бітіріп, тағы екі жылдан кейін шаңырақ көтереді. Ол өзін банкрот деп таныған болса, бес жылға дейін ипотека ала алмайды. Осыны жастарға түсіндіру қажет. Қаржы сауаттылығын отбасы, мектеп, институтта бастауымыз керек еді. Өкінішке орай, уақыт жіберіп алдық. Бірақ, біз қазірдің өзінде өсіп келе жатқан ұрпақты кірісі мен шығысын сауатты жоспарлауға үйрете аламыз», – деді мемлекеттік кірістер комитетінің өкілі.