Үндістанда маугли-қыздың ата-анасы табылды

Үндістанда маугли-қыздың ата-анасы табылды. Көп уақыт бойы орманда маймылдармен бірге тұрған кішкентай қыз адам тілін ұмытып, төрт аяқтап жүреді.

Баланың ата-анасының айтуынша, қыздары бір жыл бұрын базар маңында олардан қашып кеткен, деп жазады Daily Mail. 45 жастағы Рамзан Али Шах пен оның 35 жастағы жұбайы Назма қыздарының суретін газет бетінен көргенін айтады. «Біз өз көзімізге өзіміз сенбедік. Қызымыз базардағы ығы-жығы кісілердің арасында жүріп, бізден қашып кеткен еді. Содан бері ол ұшты-күйлі жоқ болып кетті», — дейді қыздың әкесі. Шах қызының есімі Ализа екенін және оның 10 жаста екенін алға тартып отыр. Оның айтуынша, қыз психикалық дертке шалдыққан және дәрі сатып алып тұрған кезде олардан қашып кеткен. Сондай-ақ Шах жергілікті полицияның қызын тауып беруге еш құлық танытпағанын айтады. ҚазАқпарат хабарлағандай, енді Шах пен оның жұбайы орманда табылған қыздың ата-анасы екенін дәлелдеу үшін қан тапсырулары қажет.