Назым Қызайбайға неге пәтер не көлік сыйламай жатыр?

Олимпиада жүлдегерлері елге келген соң сый-құрметтің астында қалды. Тіпті медаль алмағандардың өзіне көлік, пәтер сыйлап жатыр. Алтын медаль иеленген Елдос Сметовтің үйі тұрған көшеге асфальт төсеп тастағаны өз алдына.

Ал Париж Олимпиадасының қола жүлдегері Назым Қызайбайға елге келген соң қандай сый-құрмет көрсетілді?

Тengri Sport-қа берген сұхбатында ол:

«Әзірге ешкім ештеңе сыйлаған жоқ. Алда бола жатар. Кез келген спортшы ең алдымен ел намысын қорғайды. Біздің мақсатымыз — Олимпиада жүлдесі, Олимпиада алтыны. Сол үшін де жылдар бойы тер төгеміз. Дегенмен материалдық жағы да керек. Өйткені біз бүкіл уақытымызды спортқа арнаймыз. Әрине, өзімізді, отбасымызды қамтамасыз еткіміз келеді», — деп жауап берді.

Айта кетейік, спорттық гимнастикадан күміс жүлдегер атанған Нариман Құрбановқа да осы күнге дейін ешқандай сый-сыяпат жасалған жоқ.

JQ-Aqparat

Сурет: olympic.kz