Мопед айдаушылар енді тайраңдай алмайды

Мопедтерді тіркеуге қойып, мопед айдаушылар құжат алуы тиіс. Үш заңға тиісті өзгертулер енгізіліп, Мемлекет басшысына қол қоюға жіберілді.

Бұған дейін жылдамдығы сағатына 50 шақырымнан аспайтын мопедтер ғана тіркелетін. Қазір ел ішінде есепке алынбаған 80 мыңнан астам мопед жүйткіп жүр. Былайша айтқанда, оларға «сот жоқ». Себебі жол ережесін бұзып, камераға түсіп қалса да кім екенін анықтай алмайды. Ал тіркеліп, номер алған соң жағдай басқаша болады. Ереже бұзған мопедші автокөлік жүргізушісі сияқты жауапқа тартылады. Бұған дейін жолдың қарсы бетіне шыққаны үшін көлік шопыры жарты жылға құжатынан айрылса, мопед айдаушы 2 АЕК айыппұлмен құтылатын. Оның өзінде кім екені анықталса! Себебі дулығадан бет-жүзі көрінбейтін, номері жоқ мопедті табу шөмеленің ішінен ине іздегенмен бірдей еді.

Ішкі істер министрінің орынбасары Игорь Лепеха мопед айдаушыларға жүргізуші куәлігін алу үшін жарты жыл уақыт берілетінін айтты.
Алматы сияқты ірі мегаполис тұрғындары осы заңнан зор үміт күтеді. Өйткені өзіне де, өзгеге де қауіп төндіретін мопедшілер жұртты әбден мезі етті.

JQ-Aqparat