Министр Марат Қарабаев көлікке мініп жолдарды тексереді

Көлік министрі Марат Қарабаев көлік инфрақұрылымы объектілерін тексеру үшін автомобильмен 4 өңірді аралап шықпақ. Бұл туралы министрдің баспасөз хатшысы Жанжігіт Омархан мәлімдеді.

«Бүгін ведомство басшысы Алматы облысына келді. Ең алдымен, Шамалған станциясының айналма жолының құрылысын және «Сарыөзек – Көктал» (45-68 км) автожолында жүріп жатқан күрделі жөндеу жұмыстарын тексереді. Сондай-ақ министр «Қорғас» құрғақ портының жұмысымен танысып, «Алматы – Қорғас» автожолының сапасын бағамдап қайтуды жоспарлап отыр», — деп жазды ол.

Баспасөз хатшысының хабарлауынша, министрлік басшысы Марат Қарабаев демалыс күндерін пайдаланып, Жетісу, Абай және Шығыс Қазақстан облыстарына да барады. Алматы облысынан Өскеменге дейін автокөлікпен жүріп өтіп, министр аталған өңірлердегі жол құрылыстарын, көлік объектілерін қайта жаңарту жұмыстарын, көлік қозғалысына арналған көпірлердің жай-күйін тексереді.

JQ-Aqparat