Мешітке қымбат киім кимеген дұрыс

Мешітке баратындардың ішінде де ұрлық жасайтындар бар. Ұрыға жем болғың келмесе, барынша жұпыны киініп барған дұрыс. Өткенде біреудің бренд аяқ киімін қақшып кеткен. Бұл жолы Шымкенттегі орталық мешіттердің бірінде ер адамның 800 000 теңге тұратын сырт киімі ұрланды. Жәбірленуші полицияға шағымданды. Әл-Фараби аудандық полиция басқармасының қызметкерлері жергілікті тұрғынның ұрлық туралы арызы бойынша тергеуді бастады.

Мешіттегі бейнекамераларды тексергенде бір жігіттің күртешені киіп алып, зытып бара жатқанын көрген. Полицейлер оның кім екенін анықтап, қаладағы жалдамалы пәтерден ұстады. Қымбат күртеше иесіне қайтарылды. Сотқа дейінгі тергеу әрекеттері жүріп жатыр.

JQ-Aqparat