Мереке Құлкенов – Жазушылар одағының төрағасы

Абай атындағы опера және балет театрында Қазақстан жазушыларының кезекті ХVІ құрылтайы өтті.

Бес жылда бір мәрте өтетін жиында ақпарат және қоғамдық даму министрі Дархан Қыдырәлі Мемлекет басшысы Қасым-Жомарт Тоқаевтың жазушыларға жолдаған құттықтауын оқыды.

Қазақстан Жазушылар одағының басқарма төрағасы, ақын, Мемлекеттік сыйлықтың лауреаты Ұлықбек Есдәулет бес жылда атқарылған жұмыстар жөнінде есептік баяндамасын оқыды. Жиында сондай-ақ Мемлекеттік сыйлықтың лауреаттары, жазушылар Дулат Исабеков, Кәдірбек Сегізбаев, ақын-драматург Иранбек Оразбаев, мәжіліс депутаты, ақын Қазыбек Иса сынды ақын, жазушылар сөз алып, әдебиеттің толғақты мәселелеріне тоқталды.

Құрылтайдан соң басқарма жиынында жазушы, Қазақстанның еңбек сіңірген қайраткері Мереке Құлкенов Қазақстан Жазушылар одағы басқарма төрағасы болып сайланды. Сондай-ақ оның орынбасарлары да тағайындалды.

Мереке Құлкенов 1993-1997 жылдар аралығында «Жалын» республикалық қоғамдық-әдеби журналының бас редакторы, 1997 жылдан бері «Ана тілі» республикалық газетінің, 2000 жылдан осы уақытқа дейін «Таң-Шолпан», «Жұлдыз» әдеби-көркем, көпшілік журналдарының бас редакторы сынды лауазымды қызметтерді атқарды. «Құрмет» орденімен, ұлттық журналистиканың «Алтын жұлдыз» басқа да медальдармен марапатталған.

JQ-Aqparat