«Менің істеген ісім басқаларға сабақ болады деп ойлаймын». Қайрат Сатыбалдыұлының жазасы жеңілдетілді

Өскемен қаласының №2 соты оның жазаны жеңіл түріне ауыстыру жөніндегі өтінішін қарады. Ол 6 жылға сотталған болатын. Сот қалған 3 жыл, 3 ай және 7 күнді бас бостандығын шектеу мерзіміне ауыстыру туралы шешім қабылдады. Сотта ол кінәсін толық мойындап, ел-жұрттан кешірім сұрады.

«Кез келген азамат үшін мемлекет мүддесі бәрінен биік болуға тиіс. Халқымызда сөз бар, «жаңылмайтын жақ, сүрінбейтін тұяқ болмайды» деген. Мен жасаған қателіктерімді мойындаймын. Маған қатысты қылмыстық іс бойынша мен органдарға көмектесіп, бүкіл заңсыз қаржыны қайтарып жатырмын. Елден заңсыз шығарылған активтерді қайтару – елдің ырысын өзіне қайтару деп білемін. Бұл – Мемлекет басшысы қабылдаған маңызды шешімдердің бірі. Мұндайды көрген соң, ендігі жерде ешкім елдің ырысын сыртқа шашпайды. Мемлекетімізде соңғы жылдары болып жатқан оң өзгерістерді көріп-біліп отырмын. Осындайда бәріміз бір жағадан бас, бір жеңнен қол шығарып бірге жұмыс істеуіміз керек. Мен Президентіміздің жүргізіп отырған саясатын толықтай қолдаймын», — деді ол.

Сондай-ақ ол кезінде тізесі батқан, ақысына кірген адамдардан және Мемлекет басшысынан кешірім сұрады.

«Осыған дейін барлық істеген іс-әрекеттерімді саралауға, ой қорытуға уақыт жеткілікті болды. Жіберген қателігімді және кінәмді толықтай мойындай отырып, істеген ісіме өкінемін. Тергеу орындарымен бірлесіп жұмыс жүргізілді. Заңсыз жолмен иемденген активтерді толықтай қайтару қажет болды. Оның барлығы қайтарылып та жатыр. Мемлекет басшысының заңсыз активтерді мемлекетке қайтару ісі бойынша жүргізіп жатқан саясатын толықтай қолдаймын. Менің істеген ісім басқаларға дұрыс шешім шығару үшін сабақ болады деп ойлаймын. Ағаттық істеп, ренжіткен адамдардан кешірім сұраймын, — деді Қайрат Сатыбалды.

Күні кеше оның келтірген шығынды өтеп, 700 млрд теңгенің активтері мен мүлкін мемлекетке өткізгені хабарланған болатын.

JQ- Aqparat

Фото: gov.kz