MEGA-ға барсаңыз, дүрлікпеңіз

Бүгін Алматы қаласындағы «MEGA» сауда ойын-сауық орталығында жоспарлы антитеррорлық оқу-жаттығу өтеді. Бұл туралы терроризмге қарсы күрес бойынша қалалық жедел штаб өкілдері мәлімдеді.

Терроризмге қарсы күрес бойынша қалалық жедел штабтың мәліметінше оқу-жаттығудың мақсаты – адам көп шоғырланған жерлерде лаңкестік қауіп төнген жағдайда өзара әрекеттесу дағдыларын дамытып, сақтықты күшейту.

«Оқу-жаттығу міндеттері терроризмге осал объектілерде лаңкестік актінің жолын кесу механизмін жетілдіруге бағытталған. Сонымен қатар, оқу-жаттығу кезінде шектеулер қойылатынын хабарлаймыз. Осыған байланысты азаматтарды өткізгелі жатқан іс-шараларға түсіністікпен қарауға, қауіпсіздік шараларын сақтауға және оқу-жаттығуға қатысқан мемлекеттік қызметкерлердің заңды талаптарын сақтауға шақыру» жазылған хабарламада.

«Әкімшілік құқық бұзушылық туралы» ҚР Кодексінің 443-бабына сәйкес, қоғамдық тәртіпті қамтамасыз етуге қатысушы тұлғаның заңды талабына бағынбау әкімшілік жауапкершілікке тартылады. Сондықтан тұрғындарды дүрлікпей жоспарлы оқу-жаттығу жиынына түсіністікпен қарауға шақырды штаб өкілдері.

JQ-Aqparat