Мажар компаниясы Қазақстанда газ өндіреді

02 қараша 2023, 18:53

Мажардың MOL компаниясы еліміздің батысында орналасқан Рожковское кенішінде табиғи газ өндіруге кіріседі. Мемлекет басшысы Қасым-Жомарт Тоқаев бүгін Мажарстан Премьер-Министрі Виктор Орбанмен кездесуде инвестордың осы жобаға қатысу үлесі 192 млн доллар екенін атап өтті.
Батыс Қазақстан облысында газ өндіруге мажар компаниясымен бірге «ҚазМұнайГаз» және Sinopec (Қытай) те атсалысады. Кеніштегі табиғи газ қоры 26,8 млрд текше метр. Ал газ конденсатының үлесі -12,5 млн тонна.
2008 жылы ашылған кен орнында жыл соңына дейін 13 млн текше метр «көгілдір отын» өндіру көзделіп отыр. «ҚазМұнайГаз» ұлттық компаниясының басшысы Мағзұм Мырзағалиев журналистерге хабарлағандай, кеніштің қоры жылына 1 млрд текше метр газ өндіруге мүмкіндік береді.