Мұнарадан секіріп өлген ерлі-зайыптылармен болған келіссөздердің видеосы жарияланды

Қайғылы оқиға 15 мамыр күні Құрайлы ауылдық округінде орын алған болатын. 7 жасар Кристина Шустерді өлімші етіп сабаған өгей анасы мен әкесінің үстінен қылмыстық іс қозғалғаннан кейін ерлі-зайыптылар биік мұнараның үстіне шығып, секіріп көз жұмды. Полицейлер олармен 2 сағат бойы келіссөздер жүргізген. Алайда, нәтижесіз.

Келіссөздер жүргізілген сәтті «Диапазон» порталының журналистері видеокамераға түсіріп алыпты. Онда полицейлердің Владимир Шустерді сабырға шақырып жатқаны анық естіледі.

— Вова, оның ашуын бас, бәрі жақсы болады, біз уәде береміз. Вова, сабырға кел, мен уәде беремін, ешнәрсе болмайды, уайымдама.

— Уәде бересіңдер ме? — дейді мұнарада тұрған әйел.

Алайда, 17:40-та Владимир мен Әсел биіктен секіріп қайтыс болды. Полицейлер мен көршілерінің және туыстарының сөздері оларды тоқтата алған жоқ.

Айта кетейік, ерлі-зайыптылар былтыр қыркүйек айынан бастап бірге тұрып келген екен. Владимирдің бірінші әйелінен 7 жасар қызы, Әселдің бірінші күйеуінен 3 жасар ұлы болған. Көршілерінің айтуынша, кішкентай Кристина өгей шешелі болғаннан кейін бірден өзгеріпті. Бұрын ол ашық-жарқын болса, соңғы уақытта тым тұйық қызға айналған. Кристина Әселді «мама» деп те атап кетіпті. Бірақ, өгей шешенің қызға деген махаббаты көпке созылмаған.

Алдымен көшеде ойнап жүретін Кристинаның жоғалып кеткені туралы ақпаратты полицейлерге көршілері айтқан екен. Учаскелік инспектордың тексеруі барысында бет-аузы көгерген қыздың қамауда болғаны анықталды. Мұнан кейін Әсел мен Владимирдің үстінен қылмыстық іс қозғалып, ешқайда кетпеу туралы қолхат жазылып алынған. Артынша ерлі-зайыптылар өздеріне қол салып отыр.

caravan.kz