Көлік иесіне құлаққағыс: доңғалағыңды ауыстыр!

Бүгін өткен брифингте Алматы қалалық ІІД ресми өкілі Салтанат Әзірбек қысқы дөңгелекке ауысу қажеттігін ескертті.

Техникалық регламентке сай, қыста жүргізуші жазғы дөңгелекпен ұсталса, полиция айыппұл салуға құқылы.

Мұндай бұзушылық үшін ең төменгі айыппұл мөлшері — 5 АЕК (биыл – 17 250 теңге). Егер бір жыл ішінде жүргізуші тағы да осындай құқық бұзушылықты жасаса, айыппұл 10 АЕК-ке (34 500 теңге) дейін өседі.

«1 желтоқсан мен 1 наурыз аралығында барлық көліктеріміз қысқы дөңгелектерге көшуі керек. Бұл — қауіпсіздік талабы, өйткені үлкен мегаполисте жауын-шашын кезінде хаос басталады. Оның басты себебі – жүргізушілердің қысқа дайын болмауы», – деді Салтанат Әзірбек.

Сондықтан ол жүргізушілерді көліктерін қыс мезгіліне алдын ала дайындауға шақырды. Полиция бұл бағытта 1 қарашадан бастап профилактикалық жұмыстарын жүргізіп жатыр.

JQ-Aqparat