Әкімдік: Бұрын -соңды болмаған қар

Алматыға бұрын-соңды болмаған қалың қар түсті, деп хабарлайды әкімдіктің баспасөз қызметі. «Соңғы тәуліктерде мегаполиске 18 см қар түсті. Осының өзі оңтүстік өңір үшін ерекше құбылыс болып отыр. Бұл аймақта әдетте қардың орташа қалыңдығы 5-7 мм-ден аспайтын.

Ал, тауыл аймақтарда қар әдеттегі нормадан екі есеге мол жауған. ҚазАқпарат хабарлағандай, соңғы мәліметтер бойынша, Алматы қаласының маңындағы қардың биіктігі 32 см-ге, ал тау етегінде 60 см-ге жетті»,-деп хабарлады ведомство өкілдері. Қаланы қардан тазарту ісіне қазір барлық қалалық және төтенше жағдайлар қызметі жұмылдырылған. Қазіргі таңда бұл бағыттағы жұмыстарға 1300-ден астам қызметкерлер және 600-ден астам техника тартылған. Таңғы 8-00-ден бастап, қала тазалығына 4,5 мыңнан астам адам мен 800-ден астам арнайы техника жұмылдырылады. Ауа райының тосын жағдайының салдарымен күреске алдын ала дайындалып қойған 75 мың тонна көктайғаққа қарсы қоспалар да пайдаланылуда.