Қызылордада оқушы өлімінен кейін мектеп директоры қызметінен кетті

Қызылордадағы оқушының өліміне байланысты облыстық білім басқармасының басшысы Асқарбек Есжанов түсініктеме берді. Бұл туралы inform.kz жазды.

«Қызылорда қаласына қарасты Белкөл кентінде 12 ақпан күні түскі сағат 14.00 шамасында қайғылы жағдай тіркелді. Кенттегі медициналық мекемеге жеткізілген № 189 мектептің тоғызыншы сынып оқушысы қайтыс болды. Алдын ала тергеу жүргізіліп жатыр. Мәлім болғаны, балалар арасында келіспеушілік туындаған. Оқиға көпқабатты үйдің подьезінің алдында болған. Қасында болған үш бала оны кенттегі медициналық мекемеге жеткізген. Тергеу амалдары негізінде қайтыс болған баланың денсаулық жағдайына байланысты мәліметтер анықталады», — деді ол.

Облыс әкімінің арнайы тапсырмасымен әкімнің орынбасары, қала әкімі, облыстық білім басқармасының басшысы қайтыс болған баланың отбасына барған көрінеді. Басқарма басшысының айтуынша, оқушының өлімінен кейін мектеп директоры, тәрбие ісі жөніндегі орынбасары қызметінен кеткен.

JQ-Aqparat