Қысым көрсеткен коллектор қылмыстық жауапкершілікке тартылуы мүмкін

Коллекторлық агенттік қызметкерлері өз өкілеттігін асыра пайдаланғаны үшін қылмыстық жауапкершілікке тартылуы мүмкін. Әділет министрлігі әзірлеген «Қазақстан Республикасының кейбір заңнамалық актілеріне Қылмыстық, Қылмыстық-процестік және Қылмыстық-атқару кодекстерін оңтайландыру мәселелері бойынша өзгерістер мен толықтырулар енгізу туралы» Заң жобасында осындай түзету енгізбек.

Заң жобасын Мәжіліс депутаттарына вице-министр Алма Мұқанова таныстырды. «Қылмыстық кодексте коллекторлық агенттік қызметкерінің өз өкілеттіктерін асыра пайдаланғаны, қарыздарды өндіріп алудың заңсыз әдістерін қолданғаны, қаржылық қызметтерді тұтынушылардың құқықтарын бұзғаны және т.б. үшін жауапкершілігін көздейтін арнайы бап жоқ.
Бұл ретте Қылмыстық кодекстің 214-ші және 223-баптары коллекторлардың тек тіркеусіз коллекторлық қызметпен айналысқаны үшін, сол сияқты егер бұл әрекеттер азаматқа, ұйымға немесе мемлекетке ірі залал келтірсе, не ірі мөлшерде табыс табумен ұштасса, сондай-ақ коллекторлық қызметтің құпиясын жария еткені үшін ғана жауаптылыққа әкеп соғады.
Өз кезегінде, коллекторлық агенттік қызметкерінің өз өкілеттіктерін өз қызметінің міндеттеріне қайшы және өзі немесе басқа адамдар үшін пайда мен артықшылықтар алу мақсатында пайдалануы қоғамға қауіпті іс-әрекеттер ретінде бағалануы керек», — деді Алма Мұқанова.

Министрлік мамандары мен заңгерлер коллекторларды өз өкілеттігін асыра пайдаланғаны үшін қылмыстық жауапкершілікке тартуды ұсынып отыр.
Әділет министрінің орынбасары: «Бұл шара заңдық сауатсыздыққа байланысты коллекторлық агенттіктер қызметкерлерінің қысымына және айла-шарғысына ұшырауы мүмкін азаматтардың құқықтары мен мүдделерін қорғауды қамтамасыз етуге мүмкіндік береді», — деді.

JQ-Aqparat