«Қоғам тарапынан жасалған қысым тергеуге кесірін тигізеді». Депутат Шерзат Болаттың ісі туралы айтты

Талғардағы оқиғаға қатысты алып-қашпа әңгіме көп. Әлеуметтік желіде қызу талқылау әлі тоқтар емес. Көп жағдайда шындыққа жанаспайтын ақпараттар айтылып, бейнеүндеулер таралып жатыр. Мәжіліс депутаттары Абзал Құспан мен Үнзила Шапақ мәселенің анық-қанығын білу үшін Алматы облысына барды, деп хабарлайды jasqazaq.kz.

Бұл туралы Абзал Құспан өзінің Фейсбук парақшасында былай деп жазды:

«Істің барысын зерделеу мақсатында Алматы облысы прокуроры Берік Абызбайұлымен, Облыстың Полиция департаментінің басшысы Мейрам Жұмкенұлымен жолықтық.

Мен, заңгер ретінде, бұл ауыр жағдайларды құқықтық тұрғыда қарастырудың маңыздылығын атап өткім келеді. Мұндай істерде қоғам тарапынан жасалған қысым тергеу амалдарының объективті әрі жан-жақты жүргізілуіне кері әсерін тигізуі мүмкін.
Прокуратураның ресми ақпаратына сәйкес, қасақана кісі өлтіру күдігімен 11 адам адам ұсталғаны белгілі. Қазіргі таңда тиісті тергеу амалдары жүргізілуде.
Осы іс бойынша 170-тен астам куәгерден жауап алынып, 40-қа жуық сараптама тағайындалып, жан-жақты тергеліп жатыр.
Сонымен қатар, Шерзат Полаттың ағасы Н. Ғайыпбаевтың өлімі де Бас прокуратура мен Ішкі істер министрлігінің бақылауында екенін атап өткен жөн. Ол бойынша сот-медициналық сараптамалар жүргізілуде.
Қылмыстық істің қоғамдық маңыздылығына байланысты, мен тергеу барысымен танысып, заңгер ретінде мән-жайды нақты анықтау үшін жұмыс істеп жатырмын. Бұл істің әділ әрі ашық қаралуына ықпал ету — басты мақсатымыз.
Алғашқы нәтижелерге келсек, облыс прокуроры Берік Абызбайұлымен кездесу барысында тергеу амалдарының барынша заң аясында және тиянақты жүргізілуін талқыладық.

Облыстық прокуратура бұл істің құқықтық және әділдік принциптеріне сай қаралатынын мәлімдеп, бізге уәде берді.
Алдағы уақытта тергеу барысы мен ресми ақпараттар туралы қоғаммен үнемі бөлісіп отыратын боламын. Қазіргі таңда кез келген расталмаған ақпараттан аулақ болуға және ресми дереккөздерге сүйенуге шақырамын.
Заңның үстемдігі мен әділдік жолында бірге болайық!».

JQ-Aqparat
Сурет: Абзал Құспанның Фейсбук парақшасынан