ҚҚС туралы ұсыныс таяу күндері Парламентке енгізіледі

Қосымша құн салығы бойынша ұсыныстар бүгін-ертең Парламентке енгізіледі, деп хабарлайды jasqazaq.kz.

Ұлттық экономика министрінің орынбасары Азамат Әмрин бүгінгі баспасөз мәслихатында осы мәселе бойынша талқылау аяқталғанын мәлімдеді.
Вице-министр: «Мемлекет басшысының тапсырмасы бойынша 6 жұмыс тобы бүкіл өңірлерді аралап, бизнеспен, кәсіпкерлермен кездесіп шықты. Сол кездесулерде айтылған ұсыныстарды қазір талдап жатырмыз. Бүгін-ертең ұсыныстарды Парламентке енгіземіз», — деді.
Оның айтуынша, аймақтарды аралап, талқылау нәтижесінде ҚҚС мөлшерлемесін 16 пайыз етіп белгілеу туралы шешім қабылданған. Ауыл шаруашылығы үшін ҚҚС мөлшерлемесін 0 пайыз ету, керісінше, ҚҚС-ын қалдыру жөнінде ұсыныстар айтылған. «Сондықтан біз оны ерікті етуді жоспарлап отырмыз. Ауыл шаруашылығының өкілдері ҚҚС төлегісі келсе, төлейді. Денсаулық сақтау саласы үшін ҚҚС мөлшерлемесі 10 пайыз болады. ҚҚС салудың ең төменгі шегі 15 млн теңге деңгейінде қалады. Ол мәселе бойынша түрлі нұсқалар айтылды. Бірақ кәсіпкерлердің көбі осы шек керек екенін айтты», — деді вице-министр.

JQ-Aqparat

Фото: Үкімет