Қазақстан, Қырғызстан, Өзбекстан су-энергетикалық ынтымақтастық мәселелерін талқылады

25-26 тамызда Астанада Қазақстан, Қырғызстан және Өзбекстанның энергетикалық және су шаруашылығы ведомстволары өкілдерінің су-энергетикалық ынтымақтастық мәселелерін талқылауға арналған кездесуі өтті.

Энергетика министрлігінің баспасөз қызметі хабарлағандай, бұл басқосуда алдағы күзгі-қысқы маусымда электр энергиясын жеткізу, сондай-ақ басқа салалардағы ынтымақтастық мәселелері талқыланды. Бірқатар өзара келісімдерге қол жеткізіліп, жеткізу көлемі мен шарттары анықталды.

Тараптар электр энергиясын сағаттық есепке алуды жүргізу тетігін енгізу мүмкіндігін пысықтауға; шаруашылық жүргізуші субъектілер арасындағы жоспардан тыс ағындарды реттеуге шарттар жасасуға; жоспардан тыс ағындарды реттеуге арналған шарттардың қолданыстағы талаптарын қайта қарауға келісті.

Қатысушылар бұрын қабылданған міндеттемелерді орындауға дайын екенін растады.

Су және энергетика ведомстволары өкілдерінің келесі кездесуі 2023 жылдың қарашасында Бішкекте өтеді.

JQ-Aqparat

Суреттер: Энергетика министрлігінің баспасөз қызметі