Қазақ тілінің кеңдігін, тереңдігін түсіндім

Қазақтың тұңғыш ғарышкері Тоқтар Әубәкіров ғарыш сапарынан келгенде қазақшаға шорқақ еді. Сонда ол көпшілік алдында «Келесі жолы ана тілімде сөйлеймін» деп уәде берген-ді. Қазақ тілін қалай тез меңгергенін айтып берді. Egemen.kz.
«Қазақстанда алғаш рет өткен Қазақ құрылтайында сахнаға біраз қазақтар шығып сөз сөйледі. Мен ол жиынға Олжас Омарұлымен бірге бардым. Екеуімізді де сахнаға шығарып, сөз берді. Өз кезегінде сөз алған Олжас Омарұлына көпшілік «Неге қазақша сөйлемейсің?» деді. Сонда ол кісі: «Келесі жолы ана тілімде сөйлеймін, уәде беремін», деп маған бұрыла қарады. Мен де сол кезде қазақтардың алдында қазақша сөйлеуге уәде бердім», — деді Т.Әубәкіров.
Батыр сол кезден бастап қазақ тілін ән арқылы үйренгенін айтты.
«Әнді көп тыңдадым, түсінбеген сөздерімді жазып алып, мағынасын іздедім. Осы тәсіл көп көмектесті. Содан кейін Қызылорда халқына алғыс айтамын. Сол өңірден депутат болып сайланғанда, халықтың ортасында жүруім қазақшамды жетілдіруіме үлкен ықпалын тигізді. Солай намысқа тырысып, халықтың арасында жүріп, қазақ тілінің кеңдігін, тереңдігін түсіндім», — деді ол.