Қарақат Әбілдина қандай келін алатыны туралы айтты

Қыдырәлі Болманов пен Қарақат Әбілдина келіндерінің қандай болу керектігін айтып берді.

Қарақат Әбілдина: «Өзім ене болуға дайынмын. Жақсы ене болатынмын деп ойлаймын. Келінім дәстүрден мақұрым болмаса екен деп ойлаймын. Қазақы таным-түсінігі мол, тәрбиелі, көргені бар,келін болса екен деп Алладан тілеймін. Ең бастысы, қазақы тәрбиені көріп өскен болса, баламның өзі қалада туып-өскенімен оның бойында қазақтың иісі сөзінен де көрініп тұрады. Балам ұлттық құндылықтарды жақсы түсінеді. Өзінің деңгейіндегі қазақылық қасиеті бар бала болса жақсы болатын еді. Негізі ұлым менімен сырласады. Өзіне ұнаған қыздар болса, суреттерін жіберіп, ақылдасып кеңеседі. Ұлымның «Ғашық болдым, күйдім, сүйдім осы келін болады деген сөзін белден басып қадам жасамайтынын білемін. Ғашық болған күннің өзінде, біз ол туралы білетін боламыз.

Қыдырәлі Болманов жұбайының қандай ене болатыны жөнінде айтып берді.

«Қарақат болашақта жақсы ене болады. Конақжай, көңілі ашық, баяғы апа, әжелеріміз сияқты дастарханы жиылмайды. Қарақаттың анасы сондай жан. Балалары мойындарына асылып, жандарында жүрсе екен деймін. Мен үйге кіріп келген кезде Қарақатқа: «Келді, аяқ киімін ал, алдынан шығып күтіп ал» деп отырады. Анасына қарап қызын ал деген осы. Бастысы, қазақы тәрбиені бойына сіңірген, текті қыз болса болды», — дейді.

JQ-Aqparat