Қаладағы қалың жылқы кімдікі? (Видео)

31 мамыр 2023, 16:03

Қаскелең қаласының қақ ортасында 200-ге жуық жылқыны трассамен айдап өткен тұрғын жауапкершілікке тартылды. Бұл туралы Алматы облыстық полиция департаментінің баспасөз қызметі хабарлады. 30 мамырда әлеуметтік желілерге мониторинг жүргізу барысында Қаскелең қаласының көшелерінің бірінде біреулер қалың жылқыны шұбыртып айдап бара жатқаны түсірілген бейне анықталды. «Аталған дерек аудандық полицияда тіркелді. Іздестіру жұмыстары барысында Қарасай ауданы ПБ ЖПҚБ қызметкерлері ҚР ӘҚБтК-нің 408-бабы 1-бөлігі (ауыл шаруашылығы жануарларын жаю қағидаларын бұзу), сондай-ақ ҚР ӘҚБтК-нің 505-бабы 1-бөлігі (аумақтарды абаттандыру қағидаларын бұзу) бойынша үш азаматты анықтап, әкімшілік жауапкершілікке тартты»,- деп жазды Алматы облыстық полиция департаментінің баспасөз қызметі. Көше бойлап, көліктердің арасымен шуаған қалың жылқының иесі кім екендігі айтылмады.