Кентал волейболшы Сәбина Алтынбековадан қарызға ақша сұрады

Әнші Кентал волейболшы Сәбина Алтынбековадан 20 мың доллар қарыз сұрады. Кеше Сәбина Алтынбекова әлемдегі ең бай волейболшылар тізіміне енген болатын. Кентал Instagram желісінде спортшының жазбасының астына пікір қалдырған.
«Таңертең ұйқыдан оянғанда, әлемнің ең бай жиырма волейболшысының тізіміне енгенімді көрдім. Басқалардың менің өмірім жайлы жорамалы мені таңғалдырады. Ал шынына келетін болсақ, мен жай ғана сүйікті ісіммен айналысып, содан табыс тауып жатырмын. Мен жұмыс істеп отырғанда, біреу менің ақшамды санап, оны желіге жариялауда. Мұндайды ұнатпасам да, таңертең ұйқыдан күліп ояндым», — деді қазақстандық волейболшы.
Желідегілер Алтынбекованың еңбекқорлығына таңғалды. Ал қазақстандық әнші Кентал «Дүйсенбіге дейін 20 мың доллар (9,1 миллион теңге) қарызға бере тұршы», — деп пікір қалдырды. Желідегілер әншінің әзілін лайықты бағалады. Естеріңізге сала кетейік, БАӘ-нің жаңа чемпионы, 26 жастағы қазақстандық спортшы Сабина Алтынбекова әлемдегі ең бай волейболшылар тізіміне енген. Ақпарат көзінің мәліметінше, Сабинаның байлығы 4,7 миллион долларға (қазіргі бағам бойынша 2,1 миллиард теңге) бағаланған.

JQ-Aqparat