Картоп, қарақұмық, күнбағыс майының бағасы төмендеп жатыр

2023 жылғы 20 сәуірде жарияланған Ұлттық статистика бюросының мәліметіне сүйенсек, өткен аптада қарақұмық жармасы, күнбағыс майы (0,6%,) картоп (0,5%), қант және тауық еті – (0,2%), сәбіз және ұн (0,1%) бағалары төмендеді. Түтік кеспе мен тұздың бағасы тұрақты.

Өнімнің екі түрі — қант пен қарақұмық бағасының алты аптадан бері төмендегені байқалды. Ал соңғы 4 аптада қант, қарақұмық, күнбағыс майының бағасы тұрақты түрде төмендеп жатыр.

Бір аптадағы бағаның тұрақтылығы Астана, Алматы, Шымкент, Атырау, Ұлытау, Қарағанды, Қостанай және Батыс Қазақстан облыстарында тіркелді.
Өткен аптада әлеуметтік маңызы бар өнімдер бағасының өсуінің орташа индексі 0,1 пайызды құрады. Оның ішінде ең жоғары өсім мына өнімдерге тиесілі: пияз – 1,3%, сүт – 0,7%, айран– 0,6%, күріш – 0,3%.

Орта есеппен алғанда, ел бойынша резервтерден саудаға шығарылатын көкөніс бағасы мынадай: пияздың бағасы 150 тг/кг, картоп – 149 тг/кг, сәбіз үшін – 131 тг/кг, қырыққабат үшін – 105 тг/кг.

Әкімдіктер мен сауда және интеграция министрлігінің ақпараты бойынша, 1 ақпаннан 17 сәуірге дейін әлеуметтік қорлардан көкөніс сатудың жалпы көлемі 53 497 тоннаны құрады. Оның ішінде картоп – 24 755 тонна, сәбіз – 9 664 тонна, пияз – 11 112 тонна, қырыққабат – 7 966 тонна.

Күріш бағасын тұрақтандыру үшін Сауда комитеті өңірлерде келісімшарт жасау мәселесін пысықтауда. Ішкі нарықтағы сұранысты пиязбен жеткілікті қамтамасыз ету және оның бағасын тұрақтандыру үшін Тәжікстаннан ерте пияз сатып алу пысықталуда.

JQ-Aqparat