Үйінен қашып кеткен екі жеткіншек Талдықорғаннан табылды

Үйінен қашып кеткен екі жеткіншек Талдықорғаннан табылды. Ата-анасы мен, тәртіп сақшыларын аяғынан тік тұрғызған балалар қаладағы Бикен Римова атындағы драма театрдың маңында алаңсыз жүрген.

Олар 80 шақырым жерден Талдықорғанды көру үшін келгендерін айтты, деп хабарлайды ҚазАқпарат тілшісі. 11 және 12 жастағы ұл балалар Кербұлақ ауданындағы Шұбар ауылының тұрғындары болып шықты. Із-түзсіз жоғалғаннан кейін ата-аналары полицияға жүгінген. Екі жеткіншекті Кербұлақ ауданының ювеналды полициясының қызметкерлері тапты. «Ата-аналарының сөзінше, балалардың бұған дейін мұндай әрекеті болмаған. Олар еш уақытта рұқсатсыз басқа жерге бармаған. Қазір балалар ата-аналарына қайтарылды»,- дейді облыстық ІІД баспасөз қызметіндегілер. Сондай-ақ облыстық полицейлердің мәліметінше, соңғы екі тәулік ішінде із-түссіз жоғалған 20 адамның мекенжайы анықталған. Олардың 8-і жеткіншектер.

ҚазАқпарат