Гүлзира Айдарбекова: Күйеуіңмен тең құқылысың деген сөз дұрыс емес

Танымал продюсер Гүлзира Айдарбекова еліміздегі ажырасу себебін айтып, әйелдерді ер адамдардан бір саты төмен тұруға шақырды. Продюсер оқырмандарымен тығыз байланыс орнатып, олардың тарапынан келетін сұрақтарға әлеуметтік желіде жауап берді.
“Қазір қоғамда жиі айтылатын сөзге қарным ашады. “Өзіңді жақсы көр, күйеуіңмен теңсің, өзің ғана күшті бол” дегенді асыра сілтеп тастаған. Негізі, тереңнен ойласақ, біздің менталитетке сай келмейді. Біздің қазақ әрдайым ер адамды сыйла, әйел бір саты төмен дейді. Бізді ата-анамыз осылай тәрбиелеген. Олардың тәлімі біз үшін өмір бойы – сабақ. Жолдасымның айтқанына көбірек құлақ түремін. Дұрыс болмай жатса айтып түсіндермін. Мейлінше, ортақ шешімге келуге тырысамыз. Сіз де күйеуіңіздің бетінен алмай, тәкәппарлық танытпай, шешімін табыңыз. Отбасылық құндылық осыдан басталады”, – дейді продюсер. Айтуынша, әйелдердің ерлермен тең болуы – жат нәрсе, түбі ажырасуға әкеп соғады екен.
“Қазіргі уақытта ерлі-зайыптылар арасында әйелдер мен-мендікке салынып, артық кетіп жатады. Еліміздегі ажырасудың көбеюі де осыған байланысты. Қай жағынан алып қарасақ та ерлермен тең болуымыз – жат ұғым. Басқа ұлттарға қарасаң, қартайған шағында жалғыз қалады немесе қарттар үйіне өткізіп жібереді. Мейірім жоқ. Осындай өмірдің бетін әрмен қылсын! Біздікілер соларға еліктеп, өзіңді жақсы көр, күйеуіңе міндетті емессің” дегенді жиі айтады. Олардың дені біздің қазақы тәрбиемізге, өмір сүру салтымызға келе ме, зияны тимей де деп саралау керек. Ғаламтордағы ақпаратты сүзгіден өткізіп, керегін ғана алу керек. Қазір көп әйел “өзім”, “өзімдікі ғана дұрыс” деп кетті. Ол қазақтың “Мықты еркектің артында әйел тұрады” деген қанатты сөзімізді ұмыттырды. Ерлерге әйел тарапынан қолдау болмағасын отбасында махаббат пен мейірім азайып қалғандай көрінеді”, – дейді Гүлзира Үсенқызы.

JQ-Aqparat