Етегі жасқа толған ана қызын зорлаған адамды қамата алмай жүр (видео)

Бұл сұмдық жағдай Оңтүстік Қазақстан облысының Шаян ауылындағы (Бәйдібек ауданының орталығы) 8-сынып оқушысының басынан өткен. Анасының айтуынша, өткен айда оның 14 жасар қызын бір жігіт сыбайластарымен бірге Шымкентке басып алып кетіп, зорлап тастапты.

Бұл жайт белгілі блогер, заңгер Айгүл Орынбектің Фейсбуктегі парақшасында болған тікелей эфир кезінде жария етілді.

Блогермен әлеуметтік желідегі тікелей эфирге шыққан әйел жүрегі ауыратын қызының басынан өткен жағдайды жылап отырып айтып берді. Ол кәмелетке толмаған баласын зорлаған жігітке қатысты іс қозғата алмай жүр екен. Жергілікті тергеушілер, прокуратура қызметкерлері шарасыздық танытып отыр. Аңыраған ананы олар тыңдағысы да келмейді. Тіпті құқық қорғау органындағылар оған «қызыңыз бұл оқиғадан бұрын жыныстық қатынасқа түсіп қойған» деп айтыпты. Ал шағымданушы әйел ақылы гинекологқа барып, бұлай еместігін білген.

«Ақылы гинекологқа барғанымда, ол бұның жақында болғанын, жыныстық пердесі жаңадан жыртылғанын, бұрын жыныстық қатынасқа түссе, мұндай болмайтыны айтты» дейді етегі жасқа толған ана.

Caravan.kz