«Эскортшы қыздар» қызметін ұйымдастырған жеңгетай ұсталды (Видео)

Ішкі істер министрлігі әлеуметтік желілердегі «жабық» топтарды анықтады. Рolisia.kz жазғандай, Алматыда қалталы ер адамдар үшін интимдік және «эскорт-сүйемелдеу қызметін көрсететін сұлу бикештердің қатысуымен «жеке» секс-кештер ұйымдастырылған.

ІІМ ұйымдасқан қылмысқа қарсы күрес департаментінің қызметкерлері көліктегі полиция департаментінің ҰҚҚКБ-мен бірлесіп, сол топтардың ұйымдастырушысы мен әкімшісі – 25 жастағы алматылық бойжеткенді ұстады. Ол ақшаға сексуалдық қызмет көрсетуге дайын келбетті қыздарды іздеп, бай клиенттерді тартумен айналысқан. Қыздарға «демеуші» табуға, сөйтіп шалқып өмір сүруге жағдай жасауға уәде берген. Топқа кіру ақысы 300 доллар болған. Күдікті жеңгетайлық қызметі үшін клиенттен түскен ақшаның 40 пайызын өзіне алып отырған. Ал қалғанын қызмет көрсеткен қыз алған. Бір «кездесудің» бағасы бір сағат үшін 500 мың теңгеден басталған.

Қаржы мониторингі агенттігімен бірлесіп, деректерді талдау нәтижесінде күдіктінің 2022 жылғы қаражат айналымы анықталды. Ол бір жылда 209 млн теңгеден астам «табыс» тауыпты.

Секс-бизнесті ұйымдастырушы өз қызметін жасыруға тырысқан. Өзін Instagram әлеуметтік желісінде 100 мыңнан астам оқырманы бар табысты модель әрі блогер ретінде көрсеткен. Ресми түрде еш жерде жұмыс істемеген. Тінту барысында күдіктіден қылмыстық «бизнес» туралы жазбалары бар күнделік, жаңа және сатып алынатын жылжымайтын мүлікке құжаттар, ақ түсті ұнтақ заттың қалдықтары бар қалта айнасы, есірткі заттарын тұтынуға арналған бұралған ақша, Lexus ES 250 және Toyota Camry 70 маркалы автомашиналар, сондай-ақ салмағы 1,72 грамм болатын «мефедрон» табылып, тәркіленді. Жезөкшелікпен айналысқан «жабық топтардағы «элиталық эскортшылар» полиция бөліміне жеткізілді. Прокуратура келісімі бойынша Қылмыстық кодекстің 309-бабымен («Жезөкшелікпен айналысуға притондар ұйымдастыру және жеңгетайлық») және 297-бабымен («Есірткі құралдарын, психотроптық заттарды, олардың аналогтарын өткізу мақсатында заңсыз дайындау, қайта өңдеу, сатып алу, сақтау, тасымалдау») сотқа дейінгі іс қозғалды. Күдікті қамауға алынды. Тергеу жүріп жатыр.

JQ-Aqparat