Ертіс өзені тағы тасуы мүмкін

Облыстық жер қойнауын пайдалану, қоршаған орта және су ресурстары басқармасының бас маманы Динара Әліпованың айтуынша, Шүлбі гидроэлектрстанциясынан су жіберуге жауын-шашынның көп түсуі себеп болған.

«Бұған дейін Ертіске су Бұқтырма су қоймасынан жіберілген болатын. Осы жолы Шүлбіден жіберіліп жатыр. Су қоймасы Үлбі және Оба арнасының көмегімен толды», — дейді бас маман.

Айта кетейік, ШҚО-дағы су қоймаларының Жоғарғы Ертіс каскады құрамында Бұқтырма, Өскемен және Шүлбі нысандары бар.

Басқарма ұсынған соңғы мәліметтерге сүйенсек, су қоймаларының жоғары каскадынан Ертіске 1 мың 500 текше метр су ағызылған. Осылайша, Павлодарда өзен суының деңгейі 6-7 сантиметрге көтерілген. Айта кетейік, су қоймасынан тәулігіне орташа есеппен 1 мың 905 текше метр су жіберіледі. Сондықтан, мамандар облыс аумағында Ертіс өзені арнасынан шығып кетуі мүмкін екенін ескертеді.

Облыстағы «Қазгидромет» РМК директорының орынбасары Серік Мұстафиннің хабарлауынша, өңірде тамыз айында жауын-шашын белгіленген нормадан артық түседі.«Павлодар облысында тамыз айы да жауын-шашынды болғалы тұр. Шілде айында жауын-шашын көлемі нормадан 1,4 есе көп түсті. Жаздың соңғы айында найзағай жарқырап, бұршақ жауады. Ауа температурасы 30 градусқа дейін көтеріледі», — дейді Серік Мұстафин.

Еске сала кетсек, Ертіске су жіберу жұмыстары 21 маусымда басталған.

bnews.kz