Ерлан Қарин: «Парламенттік реформа» атты арнайы бөлімге ұсыныс жолдап, елдің саяси жүйесін жаңғыртуға үлес қосуға болады

Кеше Парламенттік реформа жөніндегі Жұмыс тобының бірінші отырысы өтіп, онда Президент Қасым-Жомарт Тоқаев бірқатар міндеттерге тоқталған болатын. Мемлекеттік кеңесші Ерлан Қарин өзінің Телеграм-каналында Парламент реформасына қатысты жазба жариялады. Онда былай делінген:
«Мемлекет басшысы Жұмыс тобының алғашқы отырысында ел азаматтарының Парламенттік реформаны талқылауға қатысуы маңызды екенін атап өтті.
Президенттің тапсырмасы бойынша мемлекеттік e-Otinish платформасында және eGov сервисінде азаматтардың парламенттік жүйені жетілдіру жөніндегі ұсыныстарын жинау ұйымдастырылады. Олар «Парламенттік реформа» атты арнайы бөлімге ұсыныстарын жолдап, елдің саяси жүйесін жаңғыртуға үлес қоса алады.
Парламенттік реформаны мемлекет пен қоғам арасындағы ашық диалог арқылы жүзеге асыру Мемлекет басшысының «Халық үніне құлақ асатын мемлекет» тұжырымдамасының қағидаттарына толық сәйкес келеді».
JQ-Aqparat

Сурет: aqorda.kz