Елімізде сусынға есірткі заттарын араластыру жағдайлары жиі кездеседі: Полиция үндеу жасады

Сурет: Видеодан кадр

Елімізде сусынға есірткі заттарын араластыру жағдайлары жиі кездеседі. Осыған байланысты Астана полициясы үндеу жасап, арнайы видео түсірді, деп хабарлайды jasqazaq.kz.

Соңғы жыл ішінде елімізде 8 мыңнан астам есірткі қылмысы анықталды. Олардың ішінде сусындарға есірткі заттарын араластыру жағдайлары жиі кездеседі. Мұндай қылмыстардың құрбандары дәрменсіз күйге түсіп, тонау, зорлық-зомбылық және басқа да қауіп-қатерлерге ұшырауы мүмкін.

«Өзіңізді және жақындарыңызды қорғау үшін полиция сұйықтықтағы есірткіні анықтайтын экспресс-тесттерді қолдануды ұсынады. Бұл шағын әрі қолдануға оңай жолақтарды дәріханалардан сатып алуға болады: олар бар болғаны бір минут ішінде қауіпті заттардың бар-жоғын анықтауға көмектеседі», — делінген жазбада.

Бұл әдіс арнайы білімді қажет етпейді және өміріңізді сақтап қалуға септігін тигізеді. Полиция осы сақтық шараларын достарыңыз бен жақындарыңызға ескертуге шақырды.