Елімізде орташа айлық жалақы 148,6 мың теңгеге жетті

Бүгін Үкімет отырысында ҚР Ұлттық экономика министрі Тимур Сүлейменов 1-тоқсандағы әлеуметтік-экономикалық даму қорытындылар туралы баяндады.

Алдымен министр отандық экономиканың сыртқы жаңа жағдайларға бейімделу кезеңінің аяқталғандығын және қайта қалпына келу жолына түскендігін атап өтті.

«Алдын-ала мәліметтер бойынша 2017 жылғы 1-тоқсанда елдегі ІЖӨ 3%-ға өсті. Өткен жылы аздаған қысқартулар болған еді. Экономика өсімінің драйверлері – өнеркәсіп, құрылыс, көлік және сауда салалары», — деді ол.

Сүлейменов ІЖӨ-нің өсуіне ауыл шаруашылығы өндірісінің 2,9%-ға артқаны септігін тигізгендігін алға тартты.

«Экономикалық өсімнің драйвері құрылыс саласы болып қалуда. Есептік кезеңде құрылыс жұмыстарының көлемі 7,1%-ға ұлғайды. Тұрғын үйлерді пайдалануға беру 25,3%-ға өсті», — деп түсіндірді ол.

Сонымен қатар министр инфляция деңгейі өткен жылмен салыстырғанда төмендегенін айтты.

«Жыл басымен салыстырғанда наурыз айында инфляция деңгейі 2,3%-ды құрады. Бұл өткен жылмен салыстырғанда 0,7%-ға төмен. Жалпы 2017 жылдың наурызында өткен жылдың сәйкес кезеңімен салыстырғанда инфляция деңгейі 7,7%-ды құрады. Біз осы жылға белгіленген 6-8%-дық мақсатты деңгейді сақтадық», — деді Тимур Сүлейменов.

Baq.kz хабарлағандай, сөз соңында 2017 жылдың қаңтар-наурыз айларында еліміздегі орташа айлық жалақы 148,6 мың теңгені құрағанын айтты. Ал жұмыссыздық деңгейі 4,9%-ға дейін төмендеген екен.