Көктем келді, онымен бірге мопед пен электрсамокатқа мініп алып, жолмен-жолсызбен жүйткитіндер көбейді. Дегенмен «асауға тұсау» салатын кез де алыс емес. Бүгін ішкі істер вице-министрі Игорь Лепеха аздап қуантып қойды.
«Елдегі мопедпен байланысты жағдай өзгереді», — деді ол.
Сөйтіп самокат пен мопед туралы заңның екінші пакетінде біраз шектеулер қарастырылыпты. Егер ол өзгерістер мақұлданып, қабылданса, мопед айдауға А1 категориялы жүргізуші куәлігін алу талап етіледі. Сондай-ақ 16 жасқа толмағандарға мопедпен жүруге тыйым салынбақ.
Тағы бір өзгеріс – қала немесе облыс орталықтарындағы әкімдер электрсамокат айдаушыларға қатысты өз ережесін бекіте алады.
«Әкімдер электрсамокатпен қай жерде жүруге болатын-болмайтынын өздері белгілейді. Мәселен, демалыс күндері саябақта адам көп болса, самокатпен жүруге тыйым салынуы мүмкін», — деді Игорь Лепеха.
JQ-Aqparat