Екі өзендегі су қоймасы 80-нен асады

Арал теңізіне құятын қос өзен — Әмудария мен Сырдарияның бойына салынған су қоймаларының саны 80-нен асады. Осы өңірдегі елдер суды тиімсіз пайдалану және экологиялық зардапты елемеу сияқты проблемалармен бетпе бет келіп отыр.
Қазақстан Президенті Тәжікстанда өткен Аралды құтқару қорының құрылтайшы мемлекеттері басшылары кеңесінің отырысында жиналғандардың назарын осы мәселеге аударды. Aqorda хабарлағандай, Мемлекет басшысы Сырдария мен Әмудариядағы су арнасының реттелу деңгейі тым жоғары екенін атап өтті. Бұған дәлел ретінде осы өзендердің бассейнінде жалпы көлемі 65 текше шақырымға жететін 80-нен астам су қоймасы салынғанын айтуға болады.
Қасым-Жомарт Тоқаев өзекті де өткір мәселеге орай «Қазақ халқында «Су –ырыс көзі» деген мақал бар. Мемлекеттеріміз су саясатын қалыптастыру барысында судың шектеулі ресурс екенін ескеруі тиіс деп санаймын. Өйткені, бүкіл өңірдің әл-ауқаты мен тұрақты дамуы суға тікелей байланысты» деді.
Саммит қорытындысы бойынша Президенттер 4 құжатқа қол қойды.

JQ-Aqparat