Димаштың әкесі баласы үшін басшылық қызметінен кетті

Димаш Құдайбергеннің әкесі аз уақыттың ішінде жарты әлемді бағындырған ұлының шығармашылығымен айналысу мақсатында мемлекеттік қызметтен кетті. Қанат Айтбаев Ақтөбе облыстық мәдениет басқармасының басшысы қызметін атқарған. Бұл туралы nur.kz хабарлады.

«I am a singer» ән байқауының ұйымдастырушылары бір ай бұрын Қанатты қонақ ретінде Қытайға шақырған болатын. Сол уақыттан бері әкесі Димаштың жанында жүрді.

Ал Ақтөбеге қайтып келген мәдениет басқармасының басшысы жұмыстан шығу туралы арыз жазған.

Алайда облыс әкімі оның бұл өтінішін қанағаттандырды ма, жоқ па — ол жағы белгісіз. Ал әзірге басшының міндеттерін оның орынбасары атқаруда.

Қанат Айтбаевтың өзі болса тұмауратып қалғанын айтып, қандай да бір пікір білдіруден бас тартты.

Естеріңізге салсақ, Димаш байқаудың кезекті кезеңінде қытай жұртын аузына қаратқан. Ол америкалық әнші Бруно Марстың Uptown Funk деп аталатын әнін орындап шыққан.

Бүгінгі таңда 14 кезеңнен тұратын байқаудың алты кезеңін Димаш сәтті еңсеріп үлгерді.