Депутат Айдос Сарым: Қыздарымызға қорада тұрған мал сияқты қарамауымыз керек

Мәжіліс депутаты Айдос Сарым Қазақстан мен Қытай арасындағы визасыз режимнің оң тұстарын айтып, жұрт көкейіндегі бірқатар мәселелерге пікірін білдірді. Депутат өз ойын Baq.kz сайтына берген сұхбатында айтты.
«Егер біз өзіміздің қыздарымызға дұрыс тәрбие берсек, оларға дұрыс патриотизм мен мәдениетімізді бойына сіңірсек, онда ешкім ешқайда кетпейді. Жігіттермізге де осылай айтар едім. Қыздарымыздың бәрі қашып кететіндей төмен деңгейге түсіп кеткен жоқпыз. Бір жағынан қыздарымызға қорада тұрған мал сияқты қарамауымыз керек бойдақ бар екен. Әр адамның таңдауы мен сана-сезімі бар. Оған мысал, мәселен әлеуметтік желіні оқып отырып, бір жазба көрдім. Онда Қытайда 18 млн, ертең олар елімізге келіп, қазақтың қыздарын жапа-тармағай алып кететіні жөнінде жазылған. Меніңше, бұл қазақ қыздарын ақымақ көру. Ақмақтықтың шегі деп білемін. Біз кейде азаматтарымыздың жеке тұлға екенін, жеке ойы бар екенін ұмытып кетеміз. Қытай осы кезге дейін айтарлықтай көбейіп кеткен жоқ. Егер бұлай қорқынышпен өмір сүретін болсақ талай дүниеден айырылып қаламыз.
Қытай – кәріс те емес, орыс та емес. Қытай деген бөлек өркениет, өзге планета. Біз олардың тілі мен мәдениетін түсінбейміз. Қазіргі таңда нан мен астығымызды шығарып отырған дара еліміз. Үрейленетін ештеңе жоқ деп ойлаймын. Осы күнге дейін Қытай азаматтары Қазақстанға 14 күнге визасыз келе алатын еді. Одан елімізде қытай қаптап кеткен жоқ. Тіпті Қытаймен шекаралас аудандарда қытайлар қаптап, қақтығыстар болып жатқан жоқ», — деді Айдос Сарым.

JQ-Aqparat