Декларация тапсыру дауға айналды

Үкімет тағы бір маңызды жобаны құрдымға жіберді. Қаржы министрлігі шенеуніктерден бастап тұрғындарға дейін жаппай декларация тапсыруды міндеттейтін істі мандыта алмаған. Сондықтан 2017 жылдың 1-ші қаңтарынан басталуы тиіс ауқымды шаруа тағы 3 жылға кейінге шегеріліп отыр. Бұған қатты шамданған Мәжіліс спикері кінәсін мойындағысы келмегендердің өзіне шүйлікті.

Нұрлан Нығматулин, Мәжіліс төрағасы:

— Қаржы министрлігі жалпы декларацияға дайындықты құрдымға жіберді. Енді оны 2020 жылға қалдырып отыр. Ал Парламенттің есігінен шыққан соң, «декларацияға депутаттар қарсы» деп сұхбат беріп жүр. Ұялмайсыздар ма?…

Бірақ бүгін Мәжілісте болмаған Қаржы министрі Бақыт Сұлтанов үшін бұл іске жанама қатысы бар Ұлттық экономика министріне біраз ақталуға тура келді. Қуандық Бишімбаевтың сөзіне сенсек, шаруаның шатқаяқтауына табысты тіркейтін арнайы электронды жүйе мен базаның дайын болмауы себеп екен. Енді атқамінерлер, судьялар, депутаттар мен ұлттық компания қызметкерлері қанша жалақы алатынын оған қандай мүлік сатып алғанын 2020-шы жылдан бастап тізіп беруі тиіс. Қымбат көлік, зәулім үй мен құнды қағаздарға қалай қол жеткізгендерін түсіндіруге заңмен міндеттелмек. Үш жылдан соң шенеуніктермен бірге қарапайым тұрғындар тіпті зейнеткерлерге дейін декларация толтырады. Яғни, пәтер, машина, басқа да жылжымайтын мүлік алса оны декларацияға жазып салық төлеуі керек. Үкіметтің ойынша, бұл бюджетке түсетін қаржыны еселеп көбейтуге көмектеспек.

ktk.kz