Дәрігерлер жүрегі тоқтаған әжені ажалдан алып қалды

Өскемен қаласының жедел жәрдем дәрігерлері 81 жастағы әжені бір ажалдан аман алып қалды. ШҚО Денсаулық сақтау басқармасының мәліметі бойынша «103» жедел арнасы қоңырау шалған әйел анасының өзін жайсыз сезініп тұрғанын айтқан. Бірден сол жерге жедел жәрдем қызметкерлері жолға шықты.
«Фельдшерлер Ерасыл Алтайұлы мен Тілеген Төлепбергенов үйге 10 минут ішінде келіп жетті. Тексеру кезінде 81 жастағы әженің жағдайы кенеттен нашарлап, жүрегі тоқтап қалған», — деп жазды ШОҚ денсаулық сақтау басқармасының баспасөз қызметі. Көмекке келген жедел жәрдем қызметкерлері шұғыл түрде жүрек-өкпе реанимациясын жасады. Абырой болғанда, содан кейін әженің жүрегі қайта соғып, тыныс ала бастады. Ауруханаға жеткізілген қарт кісінің жағдайы біртіндеп оңалып келе жатқанын айтты дәрігерлер.

JQ-Aqparat