Дариға қола жүлдені қанжығаға байлады (Видео)

Бразилияның Рио-де-Жанейро қаласында өтіп жатқан Олимпиада ойындарында бүгін жартылай финалда 75 келі салмақта жұдырықтасқан боксшы аруымыз Дариға Шәкімова  америкалық Кларесса Шилдстан ұтылып, қола жүлдегер атанды,  деп хабарлайды Риодағы ҚазАқпарат тілшісі.

Шәкімова әйгілі қарсыласымен тең дәрежеде өнер көрсетті. Аса тартысты өткен жекпе-жектің қорытындысында төрешілер шешімімен америкалық боксшы қыз жеңімпаз деп танылды. Нәтижесінде қазақтың қаракөз қызы қола медальға қол жеткізді.

Осылайша Дариға қазақ қыздары арасынан тұңғыш бокстан Олимпиада ойындарының жүлдегері атанды. Шәкімова ең алғашқы жекпе-жегінде канадалық қарсыласы А. Фортинмені 2:1 есебімен ұтып, ширек финалға жолдама алды. Одан кейін ¼ финалда ол қарсыласы ресейлік Ярослава Якушинаны 3.0 есебімен жеңген  болатын.

Еске сала кетейік, Дариға Шәкімова Петропавл қаласында дүниеге келген.Жетістіктері: Азия чемпионы (2010); Қазақстан чемпионы (2013); Қазақстан чемпионы (2014); Азия чемпионы (2015); Қазақстан чемпионы (2016); Халықаралық дәрежедегі спорт шебері.Шәкімова Олимпиада ойындарына жолдаманы Қытайда өткен бокстан Азия және Мұхит аймағы елдері бойынша Олимпиада ойындарына жолдама сарапқа салынған турнирде жеңіп алды. Олимпиада ойындарына биыл тұңғыш рет қатысты.