Дархан Қыдырәлі: Шетелдік платформалардың қызметі қазақстандық заңнамаға сәйкес реттеледі

Ақпарат және қоғамдық даму министрі Дархан Қыдырәлі Алматыда сайт жетекшілері және блогерлермен кездесіп, интернет-жарнама мен онлайн-платформалар туралы заң жобасы әзірленіп жатқанын айтты.

«Бұл заң жобасы шеңберінде қолданушылардың жауапкершілігі күшейеді. Шетелдік платформалардың қызметі қазақстандық заңнамаға сәйкес реттеледі. Әлеуметтік желі иелері өз интерфэйсін қазақстандықтар үшін мемлекеттік тілде ұсынуға міндеттеледі. Ақпаратқа қол жеткізу мәселелері жөніндегі заңға түзетулер әзірленді. Ұсынылған өзгерістер, азаматтардың ақпаратқа қол жеткізу құқығын заңсыз шектеген мемлекеттік органдардың жауапкершілігін күшейтеді, — деді министр.

Сондай-ақ ол қазіргі уақытта дәстүрлі БАҚ-тың бағыты концептуалды тұрғыда өзгеріп жатқанын, сондықтан министрлік медиа заңнаманың жаңа жобасы жұртшылық назарына ұсынылғанын және оны белсенді талқылауға шақырды.

Дархан Қыдырәлі әріптестеріне жалған ақпараттың таралмауына мұқият қарап, контент сапасына мән беруді өтінді.

JQ-Aqparat