Дағдарыс орталықтарына 1 миллиард теңге бөлінеді

Орталық коммуникациялар қызметінде өткен брифингте Еңбек және халықты әлеуметтік қорғау вице-министрі Назгүл Сағындықова елдегі дағдарыс орталықтарында қандай қызметтер көрсетілетінін айтты.

«Қазақстанда 43 дағдарыс орталығы бар. Оның ішінде 15-і мемлекеттік мекеме, қалғаны үкіметтік емес ұйымдар арқылы жүзеге асырылып отыр. Әр облыс пен қалада осындай дағдарыс орталықтары бар. Жыл сайын осы орталықтарды қамтамасыз ету мақсатында бюджет тарапынан ақша бөлінеді. Биыл 1 млрд теңгеден астам қаражат қарастырылды. Дағдарыс орталықтарында тұрмыстық зорлық-зомбылық құрбандарына арнаулы әлеуметтік қызметтер көрсетіледі. Олардың сәйкес стандарттары белгіленген. Оған сай, қызметтің 8 түрі көрсетіледі», – деді Н.Сағындықова.

Министрдің орынбасары осындай орталықтарға қоныстанған адамдарға уақытша жұмысқа орналасуына және медициналық көмек алуына жағдай жасалатынын, оларға жәрдемақы тағайындау бойынша қызметтер көрсетілетінін айтты.

JQ-Aqparat