Бюджетке түсетін қаржының 25 пайызы – Алматының үлесінде

Ел бюджетіне түсетін қаржының 25 пайызы — Алматының үлесінде.
Өңірлік коммуникациялар қызметінің брифингінде Алматы қаласы Кәсіпкерлер палатасының халықаралық ынтымақтастық бөлімінің басшысы Айнұр Баспақова ірі мегаполистің отандық экономикаға қосып отырған үлесіне тоқталды.
«Алматы — Қазақстанның ірі қалалық экономикасы бар қаржы мегаполисі. Сонымен қатар ол негізгі әлеуметтік-экономикалық көрсеткіштер бойынша көш басында. Қала экономикасының басым бөлігін шағын және орта бизнес құрайды — 57,5 пайыз, онда 869 мың адам жұмыс істейді. 2022 жылы шығарылған ШОБ өнімінің көлемі 15,7 трлн теңгені құрады. Өнеркәсіп өнімінің нақты көлемінің индексі – 131,1 пайыз. Қала экономикасының ЖӨӨ құрылымында сауда және қызмет көрсету салалары басым болып тұр. Олардың үлесі 86,1 пайызды құрайды», – деді Айнұр Баспақова.
2023 жылғы қаңтар-мамырда республиканың бөлшек саудасының жалпы көлеміндегі ең көп үлес салмағы Алматыда болған.
«Шет мемлекеттердің барлық бас елшілігі Алматыда орналасқан. Біз олармен достық, серіктестік қатынастар орнаттық. Сондай-ақ бірлескен кеңестерге қатысамыз. Іс-шараларды ұйымдастыруға жәрдемдесеміз, шетелдік компанияларға қолдау көрсетеміз. Бұдан бөлек сауда-экономикалық қатынастарды дамыту үшін ынтымақтасамыз. Жыл басынан бері Кәсіпкерлер Палатасы Қытайдың 7 провинциясының сауда палаталарының өкілдіктерімен, сауда палаталарымен, соның ішінде Фейсалабад, Лахор (Пәкістан) қаласындағы әйелдер сауда палаталарымен меморандумдарға қол қойды», – дейді Алматы қаласы Кәсіпкерлер палатасының халықаралық ынтымақтастық бөлімінің басшысы.

JQ-Aqparat