Блогерлер енді ақылы материалы мен жарнамасын таңбалауға міндетті

Ақпарат және қоғамдық даму министрлігі «Онлайн-жарнаманы таңбалау қағидаларын бекіту туралы» бұйрық-жобасын ашық талқылауға шығарды.

Бұдан былай блогерлер қандай да бір жарнама жарияласа, міндетті түрде таңбалауы тиіс.
АҚДМ бұйрық-жобасында: «Таңбалауға инфлюенсерлер (блогерлермен) коммерциялық және шарттық негізде орналастыратын онлайн-жарнама жатады. Таңбалау оны нақты сәйкестендіру мүмкіндігімен мәтіндік форматта жүзеге асырылады. Таңбалау орналастырылған материалдың жарнама екендігі туралы мәтіндік нұсқауды қамтиды», — делінген.
Құжатта көрсетілгендей, блогерлер жарнаманы әлеуметтік желілерге жүктеу кезінде оның қандай материал екенін көрсетіп, онда мына мәтіндердің бірін жазуы тиіс:
— «жарнама»;
— «жарнамалық материал»;
— «серіктестік материал»;
— «демеушілік материал»;
— «жарнама құқығында жарияланған»;
— «жарнама құқығында»;
— «демеуші төлеген»;
— «PR құқығында».
Бұйрық 8 тамызға дейін көпшілік талқылауда болады.

JQ-Aqparat