Биыл 88 000 білім гранты бөлінеді

Биылғы оқу жылына 88 мың грант бөлінді. Бұл туралы ғылым және жоғары білім вице-министрі Қуаныш Ерғалиев айтты.

Орталық коммуникациялар қызметіндегі баспасөз мәслихатында ол: «ҰБТ-ға 166 мың талапкер өтініш тапсырды. Биыл Мемлекет басшысы Қасым-Жомарт Кемелұлы Тоқаевтың берген тапсырмасын орындауды жалғастырамыз. Бұл ретте гранттың 60 пайызы инженерлік-техникалық мамандықтарды қамтиды. Сондай-ақ тығыз орналасқан, жаңа құрылған және батыс аймақтардағы жастар үшін де арнайы грант бөлінген. 2023 жылы өңірлік ЖОО-ларға бөлінетін педагогикалық квота саны артып, 6280 грант бөлінді. Ал «Серпін» бағдарламасы бойынша 3653 грант бөлінді», — деді.

«Серпін» бағдарламасы аясында жұмыс арқылы өтеу мерзімі биыл қысқарды. Бұрын 3 жыл болса, қазір 2 жылды құрап отыр. Сондай-ақ, грантты жұмыс арқылы өтеу оқыған аймақта ғана емес, бағдарлама аясында қамтылған басқа аймақтарға да баруға болады.

«Білім беру гранттарының жалпы саны 88 мыңды құрады. Оның ішінде бакалавриатта оқу үшін 73 мың грант, магистратураға – 13 мың, докторантураға 1890 грант бөлінді. Биыл грантқа құжаттарды қабылдау және оның иегерлерінің тізімін жариялау күндеріне қатысты өзгеріс болмайды. 13-20 шілде аралығында грантқа құжаттарды қабылдауды, ал грант иегерлерінің тізімін 10 тамызға дейін жариялауды жоспарладық. Жоғары оқу орындарына қабылдау 25 тамызға дейін жалғасады», — деді вице-министр.

JQ-Aqparat