Бір айда 6000 жұмыртқа ұрлаған

Қарағанды облысы Бұқар-Жырау аудандық полиция басқармасына ауданға қарасты құс фабрикасынан 6 мың жұмыртқа ұрланғаны туралы ақпарат түсті. Келтірілген шығын — 312 мың теңге.

Криминалдық полиция қызметкерлері жүргізген іс-шаралар барысында 23, 40 және 58 жас аралығындағы үш азаматты ұстады. Біреуі құс фабрикасының жұмыскері болса, қалған екеуі сол жерде күзетші болып жұмыс істеген. Олар өзара сөз байласу арқылы ұрлық жасағандарын мойындады. Жұмыскерлер жұмыртқаны қол сөмкеге салып, өткізу пункті арқылы өткізген, ал күзетшілер оны көрмеген болып, кейін өзара бөлісіп отырған. Сөйтіп бір ай ішінде 6 мың жұмыртқаны жымқырған.

Осы дерек бойынша Қылмыстық кодекстің 188-бабына сәйкес, қылмыстық іс қозғалды. Тергеу амалдары жүріп жатыр.

JQ-Aqparat